دخل الحرامى و أنا صاحى شوف قلة أدبه...

من الآخِر كده تحيا الشرطة و تحيا وزارة الداخلية المصرية و يحيا رجال الداخلية الأكفاء , ماهو مش معقول لما ضابط يغلط وﻻ أمين يتصرف بشكل غير مناسب من وجهه نظر الناس نغسله شهور فى الجرايد و لما حد يعمل حاجه تمام مفيش كلمه شكر, ده حتى يبقى عيب. وشكر خاص لسيادة النقيب/ مصطفى الشعبيني.

شارع عباس العقاد..صحراء جرداء ﻻ زرع فيها وﻻ ماء..الكلام ده من 25 سنه أيام ما أهلى سكنوا فى بيتنا ده, أما الآن..الصحراء بقت مدينة بنت تيييت, والشارع صعب حبتين, زحمه وأنا بحب الفضا, دوشه و أنا بحب الهدوء... بابا نبيع البيت و نروح أى حته فاضيه.. معاك حق الواحد زهق من الزحمه.. أمى: وبيتنا والذكريات؟!!... المهم إعلان فى الوسيط على الإنترنت... كام تليفون استعلامات سخيفه كعادة المصريين لما يشتروا أى شئ مع محاولة اظهار قوة ملاحظة و نصاحه مزيفه يفتقدها من يبديها أملا فى أن إلى بيكلمه يظن ان ده واد مش سهل و عقر و مش بيتنصب عليه.

ألو.. أيوة من فضلك أنا بتصل علشان اعلان الشقة إلى في الوسيط...حتة واد خ....احم قصدى واد مايع مياعه...لدرجة انى افتكرتها اشتغاله و لسه هرزعه إالى فيه النصيب...لقيته بيتكلم بجد...و هو  بيتكلم كده فعلا, اسغفر الله العظيم. كنت فى الشعل بس أهلى فى البيت, كلمتهم فيه واحد كلمنى عايز يبص على البيت, أبويا كلمه  لقيت تليفون بعدها من أبويا , بيقلد الواد فى طريقة كلامه " مستر راضى...ازيك يا مستر راضى... أنا كلمت مستر كريم..." إيه يابنى الواد ده؟ جبته منين ده يا... 

المهم... الولد جه كان يوم أحد, مكنتش موجود بس حسب وصف أهلى... شاب ابن ناس , عايش في امريكا طول عمره، أبوه عنده بزنس في مصر و معارض عربيات و ساكن في الزمالك، و لما أبوه توفى رجع مصر علشان يمسك البزنس وعايز يسكن في شقة في مدينة نصر, بس أهم حاجة عنده ال Security ( الأمن) وال View (الواجهة) واتفرج على الشقة وكلم أمه في امريكا ( mum) زي ماكان بيقولها بمياعة في التليفون حسب ما اتحكالي وشوية أسئلة ومن الاسئلة المهمة كان سؤاله على ال neighbors (الجيران) إيه أخبار ال neighbors هنا؟ بيتدخلوا في شئون بعد ولا كل واحد في حاله؟ المهم... طب أنا لو عايز آخد الشقة امتى ممكن؟ لو ممكن in 6 weeks or less  (ستة أسابيع أو أقَل)  أصل أنا مش عايز mum تتبهدل وعايز أخَلص decorations قبل ماتيجي من ال states. واتفقنا وفاصل حبتين كعادة المصريين وكنا مزودين حبتين  كعادة المصريين برضه, وفالآخر استقرينا على سعر. وقال أنا إنهاردة هجيب عربون أو down payment زي ما تحبوا سموها وبكرة هاجي أنا وال lawyer (محامي) بتاعنا علشان نكتب ال contract (عقد). وكان طلبه الوحيد إننا نقرا الفاتحة علشان ولا هو يدور تاني ولا إحنا نوريها لحد. يا واد يا مؤمن. وعدا ساعة..ساعتين..الساعة جت 12 .. اليوم خلص.. بس استنى يا عم حزمبل...قصدي يا عم راضي, الغايب حجته معاه. يمكن ييجي بكرة, أو يمكن مش جاد في كلامه,  وعامةً احنا مش خسرانين حاجة. بس مفرجناش حد على الشقة فعلا احتراما للفاتحه اللي قريناها معاه.

يوم جمعة, نازلين رايحين عزومة, يلا أنا لبست انجزوا, ماما: مش لاقية الخاتم , مش عارفة راح فين, طب ننزل وأبقى الدور عليه بعدين.... رجعنا. قلبنا البيت, و قعدنا نفكر طب لبستيهم امتى آخر مرة طب سبتهم فين, ومفيش حد بيدخل بيتنا أصلا.. غير الولد اللي جه شاف البيت, بس مفيش شك فيه لان أبويا وأخويا ماسابهوش لحظة. المهم الخاتم ضاع, لأ خاتمين. أمي زعلت يومين وأبويا قالها الحمدلله أحسن ماكانت تيجي في حد مننا.

  يوم الأحد, إلي  هو إمبارح, الانتركم رن, السكيورتي: أنتم عاملين إعلان عن الشقة يا مدام, أصل فيه هنا ضابط و جاي وبيسأل عن الدكتور و إعلان  لبيع الشقة. المهم قلنا لبتاع الأمن يخليهم يتفضلوا و طلعوا وكانوا 2 ضباط ومعاهم راجل عريض المنكبين رابط في ايده بالكلبش ولد رفيع صغير لا يرى بالعين المجردة, ده الشاب الي جه شاف البيت من أسبوع.

 و طلع بقى يا سيدي الواد ده حرامي بروفشيونال سرق 11 بيت بالطريقة دي, وفعلا لما شفته شكله ابن ناس جدا ! مش ممكن حتى إن الواحد يشك فيه , وده راجع لإنه فعلا ابن ناس جدا , بكالوريوس هندسة ومتعلم وبيتكلم انجليزي رائع. واعترف بكل السرقات اللي    عملها, أبويا ساب كل حاجة وكان عايز يعرف بس ابن اللذينة سرق الخاتمين امتى؟ دول خاتمين في علبة في درج مقفول في دولاب مقفول وهمه معاه طول الوقت. بس الواد اعترف إنه فعلا سرقهم من المكان ده, تقريبا لما كان بيكلم أمه وبيوصف لها ممكن يكسر حتة فين ويعمل إيه وأبويا بعد سِنة عنه علشان يديه حرية في الكلام. بس الصراحة الواد ابن لعيبة.

و اللي فعلا عجبني في الموضوع , قد إيه رجالة الشرطة المصرية والمباحث بالذات صاحية  وعارفه كل حاجة بتحصل تمام في الوقت اللي كتييير من الناس متخيلة إن الشرطة مش شغالة بقوة وكفاءة. وإزاي رجالة المباحث عرفت تجيب الولد وتعمله كمين, وتظبطه ومعاه مسروقات. مش بس كده دول بيحاولوا يرجعوا كل المسروقات على وجه السرعة للناس اللي اتسرقت.

التحية كل التحية لرجال الشرطة.

بس بكالوريوس هندسة ومتعلم وابن ناس يسرق بيوت و يدمر مستقبله ؟ مربحة؟ عنده داء السرقة؟ يمكن هروين؟ 
طب وال ناس اللي اتصلوا بعده و قلتلهم البيت اتباع؟ كان لازم يعني تقرأ فاتحة وإنت جاي تسرق؟ ماكنت تمشيها في اللذيذ كده وخلاص...