نفس الغلط ! نفس التسرع ! نفس الإسلوب الغير حضاري ! الثورة الحقيقيه تبدأ من جوانا إحنا. احنا اللي لسة زي ما إحنا.
بقالنا أكتر من أسبوع في موضوع الجيزاوي والموضوع انقلب من مجرد قضية لواحد مهرب شوية ادوية جدول هيطلعله منها قرشين لعداوه وتوتر شديد بين بلدين..وأي بلدين؟ دول مصر والسعودية ..يعني العمود الفقري للمنطقه وتقريبا للأمة العربية كلها.
رد فعل متسرع جدا وعنيف من بعض الشباب و "النشطاء" المعبرين عن الجانب المصري , بمجرد سماع الموضوع دون النظر إلى احتمال وجود ولو نسبه صغيرة جدا إنه يكون فعلا مذنب. شتيمة في الملك و المملكة , مظاهرات عند السفارة باسلوب غير حضاري و تشويه لوجه السفارة بالإسبراي الأسود و غيرها...
افتكرت جدا اللي حصل من سنتين في السودان, وازمة مصر مع الجزائر, الإعلام يولع الناس تتشحن ننزل نتظاهر قدام السفارة يحصل مشاكل أكتر بدون وجود أي تحمل للمسئولية..مسئولية وجود رعايا مصريين في السودان والجزائر ..مسئولية وجود استثمارات أجنبية فاتحة بيوت الآلاف..بدون حتى مانستنى ونشوف فين الحقيقة, اللي في الاخر اثبتت إن احنا الي غلطانين وطلع رئيس الاتحاد يعتذر ويقول فعلا الأتوبيس الخاص بالفريق الجزائري اتعرض لإعتداء في القاهرة, ولما حصل تسريب لاوراق أمن الدولة فيه مستندات بتقول إن كل ده مدبر من الجانب المصري , والله وأعلم إذا كان ده صح ؟ وبقى مصرساعتها منظرها قدام العالم همج.
صورة سميرة ابراهيم صاحبة قضية كشف العذرية وهي رافعة الجزمة في لوجه السفارة هل ده منظر لائق؟ الهاشتاج على تويتر اللي بيشتم الذات الملكية هل ده لائق؟ طب ودلوقتي لما الجيزاوي اعترف على نفسه هل في حد من دول اعتذر؟
اللمسة الوحيدة الرائعة في الموضوع كله كانت بعده عن الحكومة والسياسة تماما عندما بدأ كل من أفراد الشعبين الابتعاد عن السياسة وترك الحدود الجغرافية والحكومة جانبا وبدأ كل منهم يتحدث عن تأثير أفراد من أبناء الشعب الاخر في حياته. هي دي القوة الحقيقية اللي متقدرش تغيرها حكومة ولا مواقف تافهة.
الثورة مش مجرد تَغيير نظام , التغيير جوانا هو المطلوب , مفيش حكومة هتيجي تخلينا متحضرين ومتقدمين إلى لو بدأ ده من جوانا ...
No comments:
Post a Comment