مهمه إنتحاريه في مصلحة الجوازات المصريه

... المهم و بإختصار  أخدت شهادة الإعفاء النهائى من الجيش... فرحان و مبسوط و قلت أول حاجه أعملها أنزل الصبح بدري أثبت الإعفاء على جواز السفر علشان أسلم شهادة الإعفاء للشغل

الزيارة الأولى: الساعة 8:00 صباحا (بدري بقى والدنيا فاضيه) - مصلحة جوازات مدينة نصر

إيييييه الزحمة دي؟؟ يا جماع في مكتب إستعلامات؟ عند الضابط, طابور طويل قدام الضابط, طب يا جماعه أصل أنا عندي جواز ساري أنا بس عايز... عند الضابط... طب بس ... كله عند الضابط ... حاضر.

بعد طابور طويل لحد ما وصلت لحضرة الضابط, صباح الخير.. لو سمحت أنا كنت اخدت شهادة الإعفا.. اتفضل استمارة.. لأ حضرتك أنا... املا الإستمارة وتعالى.. يا سيدي أنا مش عايز جواز سفر جديد, أنا كل اللي عايزه ان أثبت الشهادة دي على الجواز ده لانه ساري وعليه الفيزا الشنجل... ارتفعت راسه وبصلي أخيرًا.. أنا مليش دعوة بالفيزا أنا ليَّ دعوة بالجواز بس... قلت له أنا فاهم بس ... مستعجل سافر بالشهادة , أنا مليش دعوة بالفيزا...

أنا قلت أمشي لما أشوف الاول أطَلع باسبورت جديد ولا اخلي ده, أصل ناس كتير قاللي لو فيه فيزا عالباسبورت بتسهيل عملية إن الواحد يطلع فيزا جديدة خاصةً ان كنت عايز أسافر امريكا في الصيف جدا. بس لما فكرت واستشرت والدي قالي لأ طلع باسبورت جديد واخلص بدل ماتسافر بالشهادة وكمان أهو ترجع الشهادة للشغل.

الزيارة الثانية: الساعة 8:00 صباحا (برضه بدري والدنيا فاضيه) - مصلحة جوازات مدينة نصر

برضه زحمة, ساعة علشان أوصل للضابط واقول له ان عايز استمارة مع إن المسافة متزيدش عن 2 متر طب لو الضابط ده هو اللي بيوزع الإستمارات و يجاوب على إستفسارات الناس بس معقوله كل الزحمة دي؟ المهم أخدت الإستمارة و مليتها و وقفت الطابور إياه تاني بس المرة دى كان معايا ونس, شخص في غاية اللطافه لازق في أفايا و بيتنفس بصوت مسموع مستفز جوه وداني, أول ما وصلت قدام الضابط... روح صور الشهادة والبطاقه و الجواز القديم ,  إبتسمت ابتسامة الفاتحين وقلت له مصورهم , مش عارف ده شعور جواية لأني شخص معقد ولا ده اللي حصل بس فعلا حسيت إنه اتكدر إنه معرفش يعطل ورق اللي أدامه, قعد يشخبط شوية وقال لي روح شباك رقم 1...طابور...برضه طويل زي اخوه... المهم الانسة اللي واقفة عالشباك قعدِت تشخبط... روح للضابط يأشرلك عالورق... طب ما أنا كنت لسه عنده وهو اللي بعتلك الورق أصلا يا انسة يا.... نفس الطابور بس المرة دي قلت مش هقف من الأول رحتله عند الشباك مسك الورق بص فيه كله وقالي استنانى شوية... ربع ساعة ورجعت... قالي لسه شويه لما أفضى... ربع كمان و رجعت...قالي لأ إستنى بره لسه أدامك شويه.

كان فات حوالي ساعة وشوية, قلت لنفسي ياخي ملعون أبواليوم اللي فكرت أدخل فيه أعمل جواز سفر جديد, ماهو أنا أصلا الجواز بتاعي ساري و ممكن عدي أسافر بالشهادة... لازم يعني اثبت الشهادة عالجواز وأعمل فيها فلحوس ... أنا هادخل أسحب الطلب و اجري ألحق بقيت اليوم لأن الساعة كانت قربِّت على 11:30

دخلت لسيادة الظابط, بـالوش الجبس السخيف المرسوم  عليه كلمة منكم لله يا..... لو سمحت ممكن اسحب الطلب بتاعي... وكانت المفاجأة... حاضر ثواني, وطلع الطلب بتاعت من تحت ايده و شخبط فيه شوية و بص في الشهادة وقال لي عايزين واحدة تانية غير دي...وبعدين راح مديني الورق وقال لي روح شباك واحد... شباك واحد؟ أروح ليه؟ مش قلتله يلغي الزفت ؟!!

رحت شباك واحد لقتها بتقولي 135 جنيه... معنى كده إنه ملاغاهوش!! ده خلص الطلب !!! طب مخلصوش من بدري ليه طيب؟؟؟ وليه قال لي عايز شهادة غير دي؟؟ رجعت له...لو سمحت هو فيه مشكلة في الشهادة دي ؟؟ قالي لأ تمام,  بس حضرتك قلتلي أغيرها...قالي لأ خلاص...مش عايزين حاجة... ومشيت.

أنا بأه عايز إجابات على الأسئلة دي: 

- ليه السبع شبابيك اللي بيخدموا جميع المواطنين من أول اللي جاي يستفسر لحد اللي بيستلم الجواز مزنوقين الزنقة السودة دي؟؟؟
- ليه مفيش في المصلحة او إدارة الجوازات مكتب للإستفسارت؟؟
- ليه الظابط الي بيجاوب عالإستفسارات هو الظابط اللي بيوزع الإستمارة هو الظابط اللي بيأشر على الطلبات هو الظابط اللي ليه علاقة بتصاريح الإقامة هو الظابط اللي قاعد في مكان جنب الشبابيك وكل اللي عايزين منه حاجة واقفين قدامه في حوالي متر مربع؟؟
-هو ليه أصلا ظابط؟؟ الموضوع كله ورق في ورق, ليه أصلا ظابط؟ وليه الإدارة دي جوَّه القسم؟ وليه تابعة لوزارة الداخلية؟؟؟
- ليه مبنعرفش نقف طابور؟؟
- ليه الظابط اخد مني الطلب وركنه تحت ايده حوالي ساعة مع إنه لما حب يخلصه..خلصه في 5 ثواني؟؟ وليه خلصه طيب؟
- ليه طلب منه شهادة اعفاء تانية وقال لي دي متنفعش؟؟ وليه ماهتمش أصلا بالموضوع بعدها بثواني لما سألته؟ و كأنه كان بيحاول يرمي أي عوائق وخلاص حتى لو مش مركز ولا مهتم !
- ليه أطَلع جواز سفر في 3 ساعات ونص مع ان كل الورق والصور  اللي محتاجنها معايا؟؟
- ليه موضوع جواز السفر المميكن لما برضه كل الخطوات بنعملها بنفس الطريقة العقيمة؟ ده حتى الجواز القديم كان ممكن نثبت عليه أي حاجة, لكن مع المميكن لازم كل مرة أطَلع واحد جديد !
- ليه الست اللي قاعده جوَّه كانت بتتكلم في الطبيخ وأنا جعان؟؟
- ليه الراجل اللي في الطابور كان لازق مناخيره في أفاية كده؟؟

 ليه كده ؟؟؟

أمياتى لسنة 2013

, أول السنة الجديدة... كل سنه و انتم طيبين , طبعا كل واحد عمال

 يكتب للأقارب والأحباء والأصدقاء كل سنه وانتم طيبين و ان شاء الله تكون سنه سعيدة و كل الامانى تتحقق و الأهل يدوك الكلمتيت بتوع ان شاء الله السنه الجايه فى بيتك والالش ده كله.

المهم و للأسف و لأول مره فى حياتى مابقاش حاسس انى عايز حاجه شخصيه للسنة الجديدة وﻻ عايز هدف أو حلم يتحقق غير النجاح والتقدم في شغلي (ده غير الماجيستير إلى بقالى سنين بقول عايز أعملوا) بس السنه دى انا عايز كميه من الحاجات تتغير و فعلا مفيش حاجه من دول ليها علاقه بيه, ممكن تكون هتنعكس عليا من بعيد لو اتحققت لكن مش انا إلي ممكن احققها.

نفسي ننضف ! احنا المصريين , نفسي نزيد 1% بس احترام و 1% بس أخلاق و 1% بس رحمة و نتقى ربنا 1% بس زيادة في شغلنا و فى افعالنا. طب والله متأكد انها ممكن تفرق جدا رغم ان النسبه بسيطه جدا. 

نفسي انزل بكره الاقى شوية أدب و إحترام فى الشارع و مش عايز احترام ليا, بس نفسي اشوف احترام عيل تافه أرعن سايق عربيتة بتخلف لراجل كبير عايز يعدى الشارع, نفسي أشوف الشارع واقف لمجموعه من الناس عايزة تعدى الشارع و بيعدوا زي البني أدمين زى ما شوفت فى أوروبا. نفسي ألاﻻقى الناس واقفه فى الأوتوستراد فى مدينة نصر مستنيين الأوتوبيس والميكروباص فى الحته الفاضيه جدا إلي بعد العقاد مول, و الميكروباصات ييجو يقفوا ورا بعض والناس تركب بشكل محترم و هما واقفين عالرصيف. طب والله نفسي افهم ليه الناس كلها بتروح تقف قبل و قدام العقاد مول في كتر حته ضيقه و الميكروباصات تقف صف تانى و تالت و رابع و الناس تجرى عليها تركب من نص الشارع؟ و ما أظنش ان دى كمان حاجه محتاجة أقتصاد يتحسن و ﻻ معيشه ترتفع و ﻻ أى حاجه من فتى المبررين ده. نفسي لما أدى إشارة شمال ملاقيش الناس مش راضية توسع بتعنت رهيب لحد ما يفوت عليا الفتحه و كأن كل أمله في الحياة ال 2 متر أسفلت إلى هخدهم منه لحد ما أدخل شمال. نفسي الناس تعرف فكرة إن الشمال للسريع , و مينفعش يمشي فيه على 20-40 كم و لما أرعشلة النور أكيد ده معناه إنى عايز أعدى مش عيل بيلعب في نور العربيه... و لو أديت كلاكس نفسي ميطلعش دراعة و يشاورلي على ال30سم إلي بينه و بين الرصيف و كأنه بيقولي واسعه أهى متعدى يا مجنون. نفسي ادخل أى مصلحه حكومية و ألاقي الناس... مش هقول ايجابية علشان انا مقدر انه بيقبض فتات ﻻ ولا بيكفيه و لاﻻ بيكفى عيلته بس معلش بلاش تبقى سلبى بإستفزاز زايد عن الحد, يا سيدي يعنى أنت بطلعه عالناس مثلا ؟؟  نفسى دكتور الجامعه يعرف ان وظيفته لا تكمن فى مجرد سحق أعصاب الطلاب و تضييع مجهود سنه عالفاضى. نفسي أسمع خبر محترم ليه علاقة بالبحث العلمى, زى مثلا إن زويل جاله منصب رهيب في أى داهيه...قصدى أى مكان و غار و رجع جامعة النيل لصحابها. و نفسي أشوف أي مشروع رعيب فى سيناء و ألاقى كميه رهيبه من الشباب ساب القاهرة و راح يشتغل هناك, يشتغل فى كل المجالات, مشروع مدينه زراعية صناعية عملاقة, كلها مصريين, مفيهاش أجنبي واحد. نفسي أشوف نسبة كبيره من المعاقين فى الشوارع , عايشين حياتهم عادى و بيتحركوا و يشتغلوا و يركبوا مواصلات, ده لما كنت في السويد شوفت كمية معاقين فى كل مكان عايشين حياتهم عادى جدا, في الأول قلت دا إحنا في نعمة يا أخى, ما عندناش نص عدد المعاقين ده... و أتاري عندنا عدد معاقين ييجى قد عدد شعب السويد كله بس للأسف إتحكم عليهم يعيشوا زى الأموات. نفسي الإعلام التافه بتاعنا يتكلم عنهم شوية, و يتكلم بزمه مش أداء واجب, بدل القرف والتمثيل إلي بنشوفه في التلفزيون....آه و نفسي أدخل حمام واحد بس فى مكان عام واحد بس و ما أحسش إن إلي كان هنا حيوان, مرة واحدة بس قبل ما أموت حتى مش لازم فى 2013.

و أخيرا نفسي المطبلاتيه إلي حولين الرئيس يسيبوه في حاله ساعه واحده بس كل يوم. و نفسي المسؤلين و صناع القرار فى الدولة يتقوا ربنا الصبح بس حتى و بلاش بليل, أو حتى بلاش الصبح كله ممكن ساعة واحدة بعد الفطار و كوباية الشاي.

بالنسبة لى أنا ممكن بس يبقى نفسي في حاجه واحدة بس, نفسي الموبايل البلاك بيرى يقعد يوم واحد من غير ما يهنج, أو بلاش يوم كفاية ساعتين....